СОНК ЦВРСТО ОПРЕДЕЛЕН ДА ИСТРАЕ ВО ОДБРАНА НА ЛЕГИТИМНИТЕ ПРАВА
СВИКАНО ПРОДОЛЖЕНИЕТО НА СЕДНИЦАТА НА СОВЕТОТ НА СОНК
Советот на СОНК на 14-09-2014 година ќе го одржи продолжението на прекинатата седница од 4-09-2014 година, на која на Дневен ред ќе биде донесување на Одлука за Генерален штрајк и посебните Одлуки за дејностите : детска заштита, основно образование, средно образование и култура.
Советот се очекува да усвои и Жалба до Меѓународната организација на трудот ( МОТ ) против законите за измените и дополнувањата на законите за основно и за средно образование, во делот на штрајкот. Според првите реакции од официјални лица од МОТ, направени по барање на раководството на СОНК, тие се фрапирани од овој случај, кој и според нивно кажување е единствен во сите држави од Европа и сосема е очекувано дека, за жал , Република Македонија ќе сноси подолгорочни негативни последици поради кршење на меѓународни конвенции, чие почитување е задолжителна меѓународна обврска.
На продолжението на седницата на Советот на СОНК поканети се да присуствуваат и ресорните министри, а поканата за истите важи за присуство за закажаната Прес-конференција, по завршување на седницата.
Сите информации , што пристигнуваат во Советот на СОНК, јасно укажуваат дека најголемиот дел од членството ( над 30.000 доброволно зачленети во нашиот Синдикат ), цврсто се решени да истраат до крај во легитимната борба за заштита на своите права и целосно ги поддржуваат сите активности на Советот на СОНК и на раководството на СОНК,во одбрана на интересите на нашиот Синдикат.
Во контекст на барање на строго почитување на Уставот и законите во државата, согласно надлежностите според Уставот, од СОНК му е упатено писмо на Претседателот на Република Македонија, да не ги потпишува законите за измените на законите за основно и за средно образование. (Превземи го писмото до Претседателот на државата).
|