Одржувањето на едукативните семинари со членовите на регионалните одбори на СОНК, во предходните два викенда беа со регионалните одбори на СОНК од Битола, Гази Баба, Струга и Охрид. И на овие четири регионални одбори, се повтори тоа што беше одлика и на предходните регионални одбори – без малку, целосно учество на членовите на регионалните одбори ( претседатели и евентуално секретари, како замена за претседатели кои оправдано биле спречени), недвосмислен интерес за излагањата по темите од страна на претставниците од највисокото раководство на СОНК и што е посебно значајно за сите досегашни региони – неподеленото мислење од потребата и користа за ваквите едукативни семинари.

Досегашниот впечаток на раководството на СОНК е дека поголемиот дел од членовите на регионалните одбори, не се доволно упатени во содржината на документите на СОНК, а тука се мисли на Статутот на СОНК, Програмата на СОНК и посебно за поединечните колективни договори по дејности. Ваквиот заклучок, раководството  го изведува од фактот, што во вториот дел од семинарот, кој всушност е работно – разговорен, со очекувања за давање на предлози, мислења, иницијативи, одредени состојби за некои синдикални организации, кои се за одбележување и кои се позитивни, а зошто да се крие ги има и негативни, бројот на учесници во овој дел е под очекувањата на овие семинари.

Благо речено, неприфатливо е дека, еден голем дел на членови на регионални одбори ( ова важи за сите досега одржани регионални одбори ), со изненадување да го слушнат непобитниот аргумент, дека потпишаните колективни договори на СОНК, кои се во важност и се применуваат – ВАЖАТ ИСКЛУЧИВО САМО ЗА ЧЛЕНОВИТЕ НА СОНК!  Нека ни биде простено на тежината на зборот што ќе го кажеме –  Б О Л И  оваа реалност, кога ќе слушнете прашање и одобрување од најголемиот дел од другите присутни – Зошто да членуваме во СОНК, кога ги користат истите права и тие што не се членови на СОНК ???!!!

СОНК е единствениот Синдикат, не само во нашата држава, туку и пошироко во Регионот, кој успеал со соодветниот социјален партнер, за секој од потпишаните колективни договори, да го вгради ова решение, кое има сила на Закон, а со правен јазик кажано, дури и повисоко од Закон, затоа што утврдува поголеми права, кои  со Закон се утврдени.

Непознавањето на оваа толку важна одредба од нашите колективни договори, сигурно дека досега голем дел од нашите членови имаат изгубено права кои требало да ги користат, а исто така и на целиот наш Синдикат, му има нанесено огромна штета.

На крајот, ќе го споменеме и сеуште од поедини членови од регионални одбори, поставувањето на прашањето за плаќањето на надоместокот за превоз на наставниците и често пати со обвинувања до раководството на СОНК, дека не успеале да го одбранат ова право, што не постои со самиот системски премин на финансирање од нето во бруто плата. Тоа е решение на ниво на држава и станува збор за систем и никој не можел поинаку да бара издвојување, меѓутоа раководството на СОНК сите овие години од 2009, па се до денес, во договор со раководствата на општините и со посретство на Министерството за образование и наука, во најголемиот број на општини го имаат решено на различни начини, но во секој случај со обезбедување на бесплатен превоз на наставниците, а никако со добивање на паричен надоместок, бидејќи тоа би претставувало кривично дело.

И сосема на крај, општа оценка за досега одржаните едукативни семинари, во четиринаесет регионални одбори на СОНК е во секој случај многу позитивна, а слабостите кои испливаа, а за некои од нив се обидовме да проговориме и во овој текст, раководството преку Советот на СОНК, ќе направи анализа и очекувано е да биде донесен документ, за надминување на овие состојби.

Највисокото раководство на СОНК (претседателот и генералниот секретар на СОНК) во рамките на програмата за работа и планираните активности, 22 и 23 јуни 2017 година продолжија со работни средби со членовите на СОНК од пелагонискиот регион, односно со  регионалните одбори на СОНК – Прилеп и Битола.

Работната средба во Прилеп се одржа во домот на културата ,,Марко Цепенков”, на која што можност имаа да присуствуваат сите членови на СОНК од овој Регион. Заради големиот интерес, работата беше организирана во три групи и тоа: основно образование, средно, високо образование и наука во втората група и детска заштита и култура во третата група.  Беа отворени повеќе прашања кои се од особена важност за дејностите, но и поединечни – лични прашања на дел од присатните. Како за илустрација ќе издвоиме неколку актуелни теми: намалување на бројот на ученици во паралелка, растеретување од водење на двојна евиденција и администрација, зголемување на платите во образование, наука и култура, организирање на превоз на вработените, почитување на колективните договори во целост, почитување на нормативот за формирање на групи во градинките, изготвување на Колективен договор за високо образование и наука, потпишување на колективниот договор за Култура и т.н..

Работната средба со членовите на СОНК од Регионалниот одбор  Битола се одржа во службените простории на овој Регион. И на оваа средба се отворија повеќе колективни и лични прашања кои заслужуваат внимание, исти или слични како и во претходниот Регион, прашања кои во зависност од тежината и надлежностите, ќе бидат решавани во синдикалните организации, општините или ресорните министерства.

Учесниците на работните средби го поздравија ваквиот начин на комуникација со раководството на СОНК, изразија задоволство но и апел за по чести вакви или слични работни средби. Исто така, заеднички беше констатирано дека на сите членови на СОНК им е потребен единствен и силен Синдикат, кој што во наредниот период ќе се бори за задржување на веќе стекнатите права, како и осварување на нови, повисоки права од работен однос преку колективно преговарање и договарање.

Самостојниот синдикат за образование, наука и култура на Република Македонија, претставувани од претседателот Јаким Неделков и генералниот секретар Весна Неделковска, на 27 и 28 ноември во Варшава – Полска, учествуваа на дводневна меѓународна конференција, организирана од Европската конфедерација на синдикати за образование (ETUCE). На конференцијата на тема: “Зајакнување на капацитетот на синдикатите за образование за да ги претстават професионалните потреби на наставниците во социјалниот дијалог”, зедоа учество над 15 репрезентативни синдикати од земјите во централна и југоисточна Европа.

Учесниците на конференцијата ги претставија состојбите во однос на професионалниот развој на наставниците во нивните држави, со посебен акцент на синдикатот како дел од процесот на задолжителната едукација на наставниот кадар.

Особено интерес предизвика вториот дел на конференцијата, на која што се дискутираше за социјалниот дијалог и партнерство помеѓу синдикатите и работодавачите, како и придобивките од ваквиот начин на градење на подобро образование на сите нивоа, како и подобрување на социјалниот статус на вработените во оваа дејност. Голем дел од излагачите во своите презентации го претставија образовниот систем во својата држава со посебен акцент на придобивките на синдикатот односно неговите членови, кои се стекнале по пат на социјално партнерство и дијалог.

На оваа меѓународна конференција од името на СОНК свое излагање имаше претседателот Јаким Неделков, кој пред присутните ја претстави состојбата во нашата држава. Беше претставена организациската поставеност на СОНК и партнерскиот однос на сите нивоа, од синдикална организација, локално ниво преку општините ,како и на централно ниво со министерсвата и Владата на Република Македонија. Пред присутните претседателот Неделков ја преслика реалната состојба околу социјалниот дијалог и партнерство и подвлече дека во последниве неколку месеци скоро и да не постои социјален дијалог и партнерски однос на највисоко ниво во дејностите што ги покрива СОНК, односно партнерски однос помеѓу раководството на СОНК и ресорните министри. Во овој контекст се оствари и разговор со директорот на Европската конфедерација на синдикати за образование (ETUCE), г-ѓа Сузан Флокен, на која што во детали и беше претставена состојбата во Република Македонија на полето на социјалното партнерство и социјалниот дијалог. Таа, во име на  конфедерацијата на европските синдикати за образование даде целосна поддршка за најавените чекори на СОНК што ќе ги превземе доколку не се надмине ваквата состојба,  како и најава на конкретни чекори од страна на ETUCE во рамките на нивните надлежности, како и подготвеност за доаѓање на високи преставници на  ETUCE во посета на СОНК.

 Советот на Самостојниот синдикат за образование, наука и култура (СОНК) во нов состав, по извршените избори во Регионалните одбори на СОНК во 2015 година, ја одржа 1- та редовна седница.

На почетокот, претседателот на СОНК, Јаким Неделков, кој раководеше со работата на седницата, имаше воведно излагање за активностите на СОНК во врска со спроведување на Одлуката за распишување на редовни избори во синдикалните организации и регионалните одбори за 2015 година. Претседателот Неделков истакна дека во еден дел од синдикалните организации беа пробиени и крајните рокови за одржување на изборите во истите, со што се создадоа објективни причини за пролонгирање на изборите во регионалните одбори на СОНК, а со тоа и причина за неминовно пролонгирање на активностите за одржување на   VI- от Конгрес на СОНК. Исто така,  од десетина синдикални организации на СОНК беа поднесени Приговори од група на членови на СОНК, со кои беше оспорена регуларноста на изборите и тоа беше дополнителна причина за одлагање на изборите во три регионални одбори на СОНК, а во два регионални одбори на СОНК поради годишните одмори и барање за пролонгирање на изборните состаноци од повеќе  синдикални организации, сеуште не се извршени изборите во овие региони.

Советотна седницата  утврди  Предлог – Извештај за работата на Самостојниот синдикат за образование, наука и култура на Р.М. (СОНК), за периодот октомври 2010-2015 год., Предлог – Програма за активностите на Самостојниот синдикат за образование, наука и култура на Р.М. (СОНК), за периодот октомври 2015 – октомври 2020 год. и истите се ставени на расправа пред сите синдикални организации на СОНК, која ќе трае до 20 октомври 2015 година. Исто така, Советот на СОНК  усвои Критериуми за предлагање на можни кандидати за претседател на СОНК, според кои синдикалните организации на СОНК ќе можат да дадат предлози за претседател на СОНК, кои согласно Критериумите ќе бидат сумирани на ниво на Регионален одбор, а потоа ќе бидат доставени до Советот на СОНК.

Согласно претходно наведените пролонгирања на изборните  активности  во синдикалните организации и регионалните одбори на СОНК, Советот на СОНК едногласно одлучи да се продолжи рокот за организирање и одржување на VI – от Конгрес на СОНК, да се одржи на 12 декември 2015 година.

На 21-09-2017 година, во работна посета на СОНК, беше пречекана трочлена делегација од синдикатот за образование од Република Албанија- SPASH, предводена од претседателот Неврус Каптели.

Целта на посетата беше официјализирање  на повеќе децениското пријателство и соработка помеѓу СОНК и SPASH и потпишување на Меморандум, со кој што двата Синдикати се  согласни да воспостават поблиска меѓусебна соработка по сите прашања кои се во нивна надлежност.

Особено ќе се интензивира размената на информации за состојбите во образованието во сопствените држави и за активностите на синдикатите за подобрување на системот на образование во интерес на своите членови. Исто така, двата Синдикати се обврзуваат да си даваат подршка за позначајни активности кои ќе ги покренуваат пред надлежните државни органи, воспоставување контакти помеѓу раководствата на синдикалните организации од училиштата до највисоките раководства на Синдикатите, како и соработка на други прашања, кои се во рамките на нивните надлежности, секогаш поаѓајќи со целосно почитување и респектирање помеѓу себе.

Гостите од SPASH, во рамките на својата дводневна посета на СОНК беа во работна посета на неколку синдикални организации на СОНК како што се Нико Нестор и Ибрахим Темо во Струга, Сами Фрашери во Куманово, на кој што поблиску се запознаа со нивната работата. Исто така, остварија средби и со директорите на трите училишта како и со локалната самоуправа на Струга, на кои се разговараше за прашања кои се во нивна надлежност а се од сверата на дејностите што ги покрива СОНК и се од особена важност за нашите членови.

Гостите од SPASH имаа работна средба и со дел од раководството на СОНК (претседатели и секретари на Регионални одбори), со кој што разменија повеќе искуства околу организациската поставеност на двата Синдикати, проблеми со кои се соочени нивните членови и начини на решавање, социјалниот статус на вработените во образованието на сите нивоа, образовни системи  во сопствените држави и други прашања за кои имаат надлежност синдикатите.

Заедничка констатација беше дека двата Синдикати имаат многу слични или исти проблеми во рамките на своето работење и дека со интензивирање на соработката врз основа на потпишаниот Меморандум, успесите ќе бидат многу по забележани, а со тоа и придобивките на членовите на Синдикатите уште по големи.